الواحد الأول كان مدايق من ال بيحصل في بلده لحد ما اتعوّد علي كده و مبقاش يتأثّر بالأحداث و ده مع إنه غلط بس طبيعي إنه من كتر حرقة دمك كل كام يوم ولا هتحط في دماغك أي حاجة بعد كده. بس أنا مش جاية أتكلّم عن مصر دلوقتي، أنا بتكلم عن العالم كله. ملاحظتش كمية الكوارث و القتل و المشاكل ال بسبب و من غير سبب! أكيد لاحظت، طب مفكرتش ده معناه ايه أو المفروض نعمل ايه؟ ناس تفسّره و تقولك : "ده غضب من ربنا" ماشي ممكن يكون ده غضب من ربنا فعلاً و تحذير لينا بس مين بياخد باله؟ يعني ناس نست الدين و الأخلاق و كفروا بعد ما كانوا مؤمنين -و دي أوحش طبعاً- و القتل في حياتهم بقي حاجة يومية أساسية. ناس بتخدع نفسها قبل الناس إنها صح و هم الخاربين الدنيا.
و أكيد حسيت إنك عايش في غابة، أو يمكن حاجة أبشع من الغابة. أنا شايفة إننا عدينا مرحلة الغابة دي من زمان، الدين اتنسي و الأخلاق مبقاش ليها وجود و الناس مش هاممها غير شهوتها و متعتها في الحياة. الهزار بقي زيادة عن اللزوم، مجتمع عنده كلمة "عيب" بيتعمل حسابها قبل كلمة "حرام"، البنت فيه أرخص من سعر اللحمة، الولد عليه ضغوط ميستحملهاش بشر، المخدرات و السجاير بقت حاجة متداولة، ناس مش لاقية تاكل، حكام ودونا في داهية، شعوب كاملة اتحكم عليها بالإعدام من حكامها و حكام حكامها، أمراض بتيجي من عدم، حتي الدول المتحضرّة هتلاقيها بتحاول تخرب مش تصلّح !!!
بتبقي عايز تقولهم بتعملوا كل ده ليه و عشان ايه ؟! بتبقي عايز تصرخ و تقول طب إحنا ذنبنا ايه! بيبقي نفسك كل الناس المفسدة دي تتمحي من علي الأرض في لحظة .. و السؤال ال بيدور دايما في بالك : هو العالم بقي سخيف كده ليه؟!
