'مذكرات شابة مصرية'

  المعروف إن الوطن هو المكان ال بيحتمي بيه الإنسان، المكان ال الإنسان بيحس إنه ميقدرش يلاقي نفسه إلا فيه. المكان ال لما تقع تلاقي ألف من يسندك. بس أنا ملقتش ده في وطني! ملقتش كرامتي ولا إحساسي بإني إنسانة، ولا حتي الإحساس بإني كائن ربنا خلقه و كرّمه من معاملة "البشر" ال فيه ليّا. إزاي أحس بإني عايشة و أنا مجرد وسيلة لتفريغ كبت حيوانات مسيطرة عليهم غرائزهم و شهوتهم؟ إزاي أمشي في الشارع رافعة راسي و أنا شايفة نظرات ال "رجالة" بتقطّع في جسمي؟ إزاي مكرهش نفسي و أكره إني بنت لما يومياً أسمع كلام يخليني أتمني إن الموت كان أهون قبل ما أسمع الكلام ده. خلتوني معنديش أخلاق لمجرد إني في مجتمع عشان أعيش فيه لازم أسب و ألعن كل يوم العيشة و العايشنها عشان الأدب و الأخلاق مبقوش حل.
أعيش إزاي و قلبي من جوايا فاضي عشان أخويا و قريبي و الشخص ال كان هيحافظ عليا كلهم ماتوا في عبارة و ضحوا عشان كان نفسهم يبقي ليهم مستقبل كويس؟ أفكر إزاي في إن يبقي عندي بيت و أجيب ولاد للعالم ده يتظلموا في بلد زي دي و يتعلموا تعليم بيقلل من ذكائهم و يحبطهم مش يساعدهم يبقوا أحسن.
و أحلامي .. أحلامي ال اتحكم عليها بالإعدام عشان ال أنا عايزة أتعلمه و ال بحبه و ال أنا عارفة إني هتميّز فيه شغله مش كويس في البلد دي أو أهلي بيقولولي "دوّري علي ال بيجيب فلوس أكتر". إزاي متعلمش النفاق و أنا لازم أتعامل مع شخصيات مش نضيفة عشان هم ال عندهم مصلحتي!.

 و كل يوم بشوف مكانة البنت في دول العالم و أقارن ببلدي و ألاقي نفسي بيتداس عليا ملايين المرات. و أشوف حكومتي بتعرّي في بنات من سنّي و تطعن في شرفهم عشان نزلوا يقولوا كلمة حق و أشوف حسرة أهلي عليهم و

خوفهم عليا إني أكون مكان واحدة من البنات دول في يوم من الأيام. و ليه واحد فاكر نفسه راجل يضرب بنت عشان أثبتتله إن هي أرجل منه و عامل نفسه من "رجال الدين".
 و نسوا إن ربنا خلق المرأة مش عشان يهينها لكن البشر هم لغوا المفروض و هضموا الحق و كسروا القواعد. بستغرب إن ربنا الخالقنا ال بإيده يعمل أي حاجة رحيم بينا أكتر من عباده ال يقدر ينسفهم من علي وجه الأرض. يعني العباد بيستقووا علي العباد و نسوا إن رب العباد هو ال بإيده كل حاجة..
فوقوا شوية يا بشر، و افتكروا إن البتعملوه هيتردلكم في يوم من الأيام عشان كما تدين تُدان. إهانة ليك يا "راجل" يا "مصري" إني أمشي في الشارع و أنا عارفة إني هتئذي. متكفرونيش أياً كان لبسي أو فكري .. متخلونيش للحظة أشك في عدالة و رحمة ربنا عشان انتوا ال خلتوه مجتمع ذكوري شهواني .. متخلونيش أعيش و أنا مقتنعة إن أكبر ذنب في حياتي هو إني .. بـــنــــت.