واحد من معتقداتي -ال أنا بآمن إنها صح- إن الإنسان ال مش بيحلم ده مش عايش. و مش قصدي الأحلام ال بتطلع من عقلنا الباطن، قصدي أحلام اليقظة دي :). طب تعالوا نحسبها، إزاي واحد يقدر يومه يعدي من غير ما يفكر هو عايز يبقي ايه في المستقبل أو عايز يزوّد ايه لأحلامه و سقف طموحاته ؟ و إزاي متحسش بالدفء الجميل ده لما تفتكر إن عندك مسئولية قدام نفسك و أمل غيرك فيك إنك تحققها. هتقابل ناس يحبطوك، يقولولك "حلمك ده مش واقعي" أو "صعب علي فكرة إنك توصل لده" أو "هاهاهاهاها ده انت رايق أوي !" سيبك منهم دول وحشين. متسمعلهُمش حتي لو كانوا من أقرب أقرب الناس ليك عشان معني إنهم قالولك كده يبقي هم ميعرفوش يعني ايه حلم و المفروض تزعل عشانهم.
أحلامك دي شئ مقدسة بالنسبة لك متسمحش لحد يهينها ولا حتي انت و لو مححقتهمش احلم تاني و تالت و اسعي لتحقيقهم، و افتكر إن الواقع صعب يتعاش فيه من غير خيال و إن أحلامك هي البتديك أمل في بكرة، هي ال بتحسسك إنك ليك قيمة في الحياة دي. احلم، متخافش إنك تقع عشان غيرك وصلوا لأحلامهم و غيرك اضطروا يقعوا و يقوموا مائة مرة عشان يوصلوا ;)
No comments:
Post a Comment